Garo Hills unit-ni All Meghalaya 4th Teachers Association dolni dilgiparang sak 1,521 skigiparangni palo Education Minister Rakkam A. Sangma-ko Secretariat-o gronge adita neng·nikanirangko nirokatchina mol·molangaha. Ia skigiparangko Assistant Upper Primary teacher-oni a·dok sorkari 2012 bilsio 4th teacher-ona de·jitaha.
2006 bilsioni Assistant Upper Primary skigipani kamna rimnapako man·e ru·utbea somoirangna chong·motan 8-16 bilsirangna ka·baengani gimin uamangni kamko regularize ka·china dabiangaha. Betonrangko on·anioba uamangni man·enggipa hajal 18, adhoc skigiparangna baten komienganina 4th teacher-rangnaba apsangrik on·china janapangaha. 4th teacher-rangba gipin skigiparang jekai adhoc UP, deficit UP aro government UP teacher-rang baksa ru·ute kam ka·ani gimin aro apsan daken neng·skime dangdike on·enganina mikkang nitegija betonrangko suale on·china aganangaha.
Uamangko gipinrangoni dingtange jakkalenganiara article 14-o apsan kamna apsangrik betonko sualna dongimin niamko pe·ani ong·a ine skigiparang janapataha. Meghalaya Service Rule-ni niamo pangchake sorkarini kamko ka·gipa pilakan annual increment, gratuity, promotion, retirement-o man·gnirang aro gipinrangko man·enga. Iasan ong·aigija bilsi 10-na bate ka·gimirangna on·gipa earned leave, maternity leave, festival advance aro uandaken dingtang dingtang namgnirangko man·engani gimin uamangnaba nirokate apsandaken on·china mol·molangaha.
Bi·sarangni namroro silroroanina neng·skime kamrangko ka·genchimoba betonrangko name watjani a·selo skigiparang nokdangnigita, tangka paisa, nanganirangna aro salantini janggi tanganio neng·nikaniko man·enga ine 4th teacher-rang Education Minister Rakkam Sangma-na janapate memorandum-ko on·angaha.
