MeECL Progressive Workers Union (MPWU) dolrang, MeECL department-o permanent ong·e kam ka·enggiparangni apsangipa kamrangko ru·uta somoirangonin salantio ka·baenga ine u∙iatangaha. Iani gisepon uamangnaba permanent ong·e kam ka∙giparangni beton man∙agitan apsan dake on·chinagita Meghalaya High Court-ni on·gimin raini kakketgipa chittiko MeECL-ni CMD-na da·al salo on·angaha.
Indake apsangipa kamrangko ka·enggiparangna apsan man·gnirangko on·a nangani bidingo MeECL-nigita neng·nikanirang dongode High Court-ni rai on·aoni ja gnini gisepon chu·sokatchina somoikoba on·angaha.
Ian ru·uta somoirangna apsangipa kamrangko ka·e apsan man·gnirangko niamrango pangchake High Court-ni rai on·aniko man·a chu·sokaniara bang·a bilsirangna dangdike on·enggiparangni aro bilsi 7 na MeECL Progressive Workers Union-ni jotton ka·anichi chu·sokna man·aha ine parakataha.
Permanent ong·e kam ka·giparangni apsangipa kamko ru·uta bilsirangoni ka·genchimoba uamangna salantini hajirakosan on·an baksana maming bariatanirang dongja aro 2017 bilsio uamangni Union ko bikotna skangde ia kamrangni bidingo niamo pangchake aganani bilrangba dongjachim ineba MPWU ni President Mantphrang Kiri Lyngdoh aro Vice President Jayanto Sangma parakataha.
