Da·al pringni bako, Marathon katsusaaniko Meghalaya AIDS Control Society, Don Bosco College Tura-oni a·bachengate Chandmari, Ringrey, Hawakhana aro Jerusalem-gita katate DBC-o re·bapile matchotataha.
Ia marathon-o bakko ra·na Garo Hills-ni dingtang dingtang college-rang chong·motan Don Bosco college Tura, Tura Government college, Tura Christian college, Tikrikilla college, Loyala college aro Abong Noga college-rang re·baaha. Flap off ka·aniko Fr. Januarius Sangma-ni jakchi ra·doate marathon-ko abachengataha.
Me·asarangni gisepo Nirest R. Marak (TGC) skanggipa, gnigipako Sharebirth R. Marak (DBC) aro Peter Mark (DBC) gittamgipa ong·angaha. Me·chikrangni gisepo skanggipako Susana M. Sangma (DBC), gnigipako Tulsi G. Momin (TGC) aro gittamgipako Daiana Ch. Marak (DBC) man·angskaaha. Cheanggiparangna adita tangka paisarangko on·angaha jean skanggipana gong 10,000, gnigipana gong 7,000, gittamgipana gong 5,000 aro Garo Hills-ni palo Shillong songjinmao bakko ra·na seoka man·angaha.
Ia somoini bako, Red Ribon club DBC-ni Nodal Officer Dr. Barbara Sangma, Aids-ni bidingo chatro chatrirangna adita talataniko on·angaha. Apsandake, DBC ni Principal Shillong-china seoka man·gipa chatro chatrirangko katanio bakko ra·na skang an·tangtangko mangrakate name tarisamsochina didiangaha.
