Ia bilsini Joint Entrance Examination (JEE)-o chugipa gadango chu∙sokanichi India a∙songni nambatsranggipa poraichakram Indian Institute of Technology (IIT)-o napnagita Tura songjinmani chadambe saksa Jonathan Sinkam M. Sangma seokako man∙anian gisiko nanggipa chadamberangna nambatsranggipa dakmesokani ong·a.
Bilsi 18 ong∙gipa chadambe Jonathan dingtang mancha chatro chatrirangna poaraianio ru∙uta somoirangko jakkalana bate pangnan gisiko nange poraiani aro namgipa tarisamsoaniko ka∙na nangbataniko uamangna didianiko on∙angaha. Jonathan, ia bilsini JEE Mains 2024-ni B. Planning-o Scheduled Tribe-ni bako skanggipa gadangko man∙an baksana 6 gipa gadangko B. Architecture-o man∙angskaaha jean North East aro Megahalaya a·dokna aro mongsongabte A·chik jatna mikkim rasongko ra·baani ong∙a. Ua IIT-Bombay-o Aerospace Engineering-ko porainagita seokako man·angaha.
Chu∙sokgipa ong·nagita ru·uta somoirangna lekka baksa somoiko on∙anisan ong∙aigija, namgipa tarisamsoaniko aro gisiko nange poraianian gamchatbegipa ong∙a ine Jonathan parakangaha. Jonathan, Captain William’s School, Tura-o poraiangaha aro Class X CBSE porikkako pass ka∙ani ja∙man ua Velammal International School, Chennai-o Class XI aro XII ko poraiangskaaha.
Sangma JEE porikkako see IIT-Bombay o napnagita cholko man·anira uni jumangko chu·sokatani ong·a aro ian chingna namen katchabeani ong∙a ine ma∙aparang parakangaha. Jonathan, skanggipa IIT-Delhi o seokako man·genchimoba uni miksonganian IIT-Bombay o napna ong∙a ine uni ma∙gipa Dr Riksilchi M Sangma aro Dr Aelifter R Marak aganangaha.
Ian namen katchaani ong∙an baksana susaaniba ong∙gen maina ia poraianiara dingtang mancha aircraft engineering-o pangchakgipa ong∙a ine Jonathan parakataha.
