Meghalaya State Skills Development Society (MSSDS) ni ning∙o Sewa Inland training Centre-ni Wedding Gown Designing and making course-o skienggipa aro skie ra·enggiparangko kragija jakkalenga ine gitcham skie on·enggiparang re∙anggipa sal somoirango uamangni suk ong∙gijaniko parakataha. Ia training centre-ko Project Manager Trenish R. Marak aro Trainer Sewa Rai jemangan jiksesa ong·a uamangni dilanio dakenga jekon Tura Nehru Ading-ni Sunset Square building-o chalaienga ine u∙iatangaha.
Koborna parakatanigitade, ia training centre-ko Garo Hills-ni manderangna an∙tangtangni changa sapaniko bariatna sorkarinigita maming tangka paisarangko nanggija skie ra∙na bikotgipa ine ma∙sina man∙aha. Indake ong·engon je napgipa student-rangoniko niamni a∙palo admission ra∙anio tangka gong 1,200 ko registration fee-na aro toilet fee-na gong 100 ko japrako ra∙aniko dakenga ine u∙iatangaha. Re∙anggipa 2022 bilsio skanggipa batch-o napgiparangoniko gong 500 kae registration fee ra∙angaha ineba u∙ina man∙angaha.
Ia taining centre-ni kutturirangko para hisapo ra∙aniko dakenga jeon staff room-ba dongjani a∙selo iano kam ka∙giparang verandah-rangosa asongna nangao ga∙akenga ine u∙iatangaha. Unbaksana re∙anggipa somoio uamang mi cha∙ani somoio trainer-rangni room-ko jakkalanina, Project Manager Trenish R. Marak aro Trainer Sewa Rai-ni jako aditan kragija maneng saianiko man∙angaha ine suk ong∙gija parakataha.
Ia bilsini May jao sak 150 studentrang admission-rangko ra∙anggenchimoba kutturirang chu∙ongjani a∙selo class ge∙prako sak 30 rangkosan asongchakatna man∙aia. Iani gisepon ia training centre-ko chalaienggiparangni kragija uamangko jakkalani a∙selo bang∙a student-rangan atagrikon wate katangtokaha ineba parakataha. Una agreba ia centre-o electric machine bolsaba donggijani a·selo sorkarina photo ka∙e mesokatna mangmang re∙anggipa chango bolgni electric machine rangko sroe mesokatchenganiko dakangaha ineba u∙iatangaha.
Batanggimin somoioba Edenbari-o Do∙sadil training centre, Floriculture-ko chalaienga ine sorkarina mesokatna sakgni trainer-rangko rimange Project Manager photo ka∙dilangaha ineba parakataha. Uamangni beton man∙a nanganikoba da∙ona kingkingba on∙chipgija donenga ine u∙iatan baksana saksa me∙chikma trainer-ko ia training centre-ni kutturirangkoba rongtalatna aro salantian teer number-ko ra∙e on∙a ge∙etronganikoba janapataha. Ia pilako niroke kam ka∙niara Skill Development Officer-ni jako ong∙genchimoba da∙o ong∙engipa a∙selrangko donnue kamrangko ka∙enga ine matnangataha.
Trainer aro student-rangni kosako indakgipa kragijagipa kamrangko ka∙angani gimin ia centre-ko chalaienggipa manderangni kosako kragipa sinjetaniko dakangchina gitcham trainer-rang West Garo Hills-ni Deputy Commissioner-na chitti seachi mol∙molangaha.
