Da·al salni bako World Chess Day-ko gisik ra·e maniani bakgita bilsi 16 ni ning·o ong·gipa chadamberangna Chess Tournament-ko Tura DC Park-o ong·atangaha. Ia tournament-ko Garo Hills Chess Association (GHCA) ni President Jesse R. Marak oprake on·angan baksana Chess kal·anio nangchomotgipa chanchiani aro budiko jakkalna nanganirangni bidingo agan-talate on·angha.
Ia kal·susaanio Nikman G. Momin uni changa sapaniko jakkale kal·anichi Championship title-ko chenagita man·angaha. Apsan daken skanggipa Runners Up-ko Mayukh Sah, gnigipa Runners Up-ko Amaziah Gapesa Ch. Marak aro gittamgipa Runners Up-ko Nikgame G. Momin cheangskaaha.
Ia tournament-ko bon·kame GHCA-ni General Secretary Tengrang R. Sangma-ni dilanichi chegipa chadamberangko mittelangan baksana tangka paisanigita boksis aro certificate-rangko dingtang dingtang dilgiparangni jakchi suale on·angaha. Una agreba matchotataniko an·saoatnagita Meghalaya Grassroot Project-nigita concert-koba ong·atanngaha.
