Garoland State Movement Committee (GSMC) C.E.B H.Q Tura, India-ni Constitution Article 3-o on·gimin bilo pangchake Garo-rangna dingtang a·dokko ra·bana aro Garoland State-na dabianiko bilakbatatna Tura-o tom·bimonge chanchirimangaha. GSMC dolrangni Garorangna dingtang a·dokko dabianiara A·chik jatni bilko, a·arangni nokgipa ong·aniko, ku·agananiko, dakbewal rikbewalrangko, dakbewalko ja·rike kamrangko ka·ani ba uandakgipa dingtang dingtang jakkalanirangko ripingna miksongani ong·a ine GSMC-ni Co-Chairman Jakrak A. Sangma aganangaha.
A·chik jatrang a·gilsak a·bachengbaonin janggi tangbaenga jeon A·chik pagitchamrangni niksamsoanirango pangchake a·dok dingtangko dabienga. Unbaksana India-ni Constitution-o bil on·ao pangchake ma·mong sorkari Garoland State-na dabianiko on·kujana kingking dontonggija dakgrikangkugen ine Sangma aganangaha. Ia tom·e chanchrimanio sakgni mongsonggipa dilgiparangko seokangaha aro Balkarin Ch. Marak-ko Co-Chairman-ni gadangoniko Acting chairman-ni gadangona ra·doatskaaha. Una agreba organization-ko nambate chalaina aro dingtang a·dokna dabiani bidingo u·ie kamko ka·na man·agita LL.B poraie matchotgimin Edward Marak-ko Additional General Secretary-na seokangaha.
A·chik jatrang pilak nikjumanganirangko chu·sokatna India-ni Constitution-o on·gimin bilo pangchake dingtang a·dokko dabina bil gnang. Iani kosakon atchikape chengonin songdongengeggipa jatrangna UN-ni 2007 bilsio Declaration on the Rights of Indigenous People (DRIP)-oba bil on·aniko parakatani donga ine Sangma janapangaha. Indake ong·engon A·chik jatni namgnina aro on·gimin bilrango pangchake Garoland State-na dabina raken ja·kurangko de·angkugen ineba Sangma agandapangaha.
