Songadam nokadamrango janggi tangenggipa manderangni neng·nikanirangko olgrokatna ma·mong sorkarioni chamatgipa scheme-rangni namgnirangko man·jaenganina, Tura-ni MDC aro BJP-ni State Vice President Bernard N. Marak “Center Scheme, Pass or Fail” campaign-ko a·bachengatangaha. Ia campaign-ko a·bachengatani miksonganiara, ma·mong sorkarini chamatgimin scheme-rangni bidingo manderangna u·iatna aro ia chamatgimin scheme-rangko a·dok sorkarini kam ka·anio chu·sokgipa ong·ama ong·jaenganiko parakchina chol on·ani ong·a ine Marak aganangaha.
Ia campaign-ko dakaniara namgipa ja·ku de·ani ong·a jeon ma·mong sorkari biaprangko baseesa aro tangka paisarangko chu·ongagita chamatja ine manderangko bebe ra·atrongenga. Iani gisepon kakketgipa obostamanchara, politics-ni dilgiparang an·tangtangni party-ni namgninasa tangka paisarangko jakkalsretenga ine Marak parakangaha. Ia campaign-ko a·bachengani mongsonggipa miksonganiara manderangna scheme-rangni bidingo u·iatna, sakantini bil gnangani aro mai bewalo scheme-rangko kam ka·e report-rangni sakkirangko on·enggipani bidingo u·ie ra·ani ong·a.Prime Minister Narendra Modi, kangal cholgrirangna aro chadamberangna ge 200 scheme-rangna batpile a·bachenge on·aha jeon bang·bata songadamni manderang nangchongmotgipa namgnirangko mangmangba man·a amjaenga ine Marak aganangaha. Unbaksana Gambegre jolo scheme-rangko bye poll-na skang am·sandianirangko dakangaha jeon politics-ni dilgiparang jakkalsretaha ine ma·sina man·aha. Apsan daken kamrangko matchotaha ine tol·e kakketgijagipa report-rangko on·aniko adita department-rang ma·mong sorkariona sokataha ineba Marak aganangaha.
Indake ong·engon manderangna nangchongmotgipa nanganirang jekai ringani chi, nok jam, paikana, rama, indin sualgipa merong, hajira, namgipa skulrang, sanchakram biaprang ba uandake dingtang dingtang ma·mong sorkarinigita songsalni namgnina chamatgiminrangko baditana man·enganiko Prime Minister-de nikatjaenga.
A·dok sorkarini adita department-rang niamrangko pe·e kamrangko ka·anio tik ong·jae, ma·mong sorkarionin tangkarangko chu·ongagita chamatja ine dilgiparang manderangko bebe ra·atenga. Iani bidingo adita department-rangni kosako ma·mong sorkari baksa nanggipa kamrangko ka·angan baksana songni manderangni agananirangko knae ra·e ja·kurangko de·anggen ine Marak aganangaha. Ma·mong sorkarinigita chamatgimin scheme-rangko Prime Minister chamatenga jeon kam ka·anirangko nirok simsakna an·ching sakantini kam ong·a ineba Bernard Marak aganangaha.
