Rajabala-oni Selsella-ona re·gipa ramani obostarang namjasrangjani gimin Rajabala Unit-ni A∙chik Conscious Holistically Integrated Krima (ACHIK) dolrang Public Works Department (PWD) Minister Prestone Tynsong-na janapate ta∙rake tarie on∙china mol∙molangaha.
Ia rama ru∙uta somoirangonin nosto ong∙e dongani a∙sel Rajabala aro wilwilao songdongenggipa manderang bang∙a neng∙nikanirangko chagrongna nangtokenga. Ramarang namjani a∙selo chatro chatrirang, office re∙giparang aro songni manderangnasan re∙a doanio neng∙nikaniko ra∙baaigija nangchongmotgipa cha·a ringaniko aro gipin bosturangko salruragipa garirangnaba neng·nikaniko on∙enga. Ia pilak neng∙nikanirangko skanggipao done kam ka∙e nanggipa tangka paisarangko chamate ramako ta∙raken tarie on∙china Rajabala Unit ACHIK ni President Sildorik Ch. Sangma mol·molataha.
Rajabala-Selsella rama bang∙a songrang aro jillarangona nangrimatgipa ong∙genchimoba ramarango a∙kilok bang∙ani a∙sel re∙a do∙anio namen neng∙nikani aro kenani ong∙a ine janapataha. Changni changna ia ramako tarie on∙china ACHIK dolrang daito donggipa department-rangko mol∙molangaha aro iani gisepon uamangni neng∙nikanirangko ma∙sichake ru∙utgija somoion PWD Minister knachake manderangni namgnina kamrangko ka∙e on∙angna ka∙dongsoenga ine parakataha.
