Junior Boys National Football Championship (Tier 1) BC Roy Trophy-o bakko ra·nagita Meghalaya-ni robol kal·gipa dolrang Shillong songjinmaoni Chattisgarh-ona re·chakatangenga. Ia kal·susaaniko Narainpur-o ong·atanganio Meghalaya-ni robol kal·gipa dolrang Punjab, Chandigarh aro Karnataka baksa Group C o susaagrike kal·angskagen.
Ia kal∙susaanio Group ge∙bri donggen jeon group ge∙prako dolbri gnang. Kal∙susaanio Group ge∙prakoniko nambate kal∙gipa dolsakosan seoke semi-final-o kal∙na cholko on∙angskagen. BC Roy Trophy na kal∙susaanio Meghalaya dolrang-na match ge∙prakan namen mongsonggipa ong·enga ine Coach Lekini Suting aganangaha. Meghalaya dolrang July 28 tariko Chandigarh, July 30 tariko Punjab aro August 1 tariko Karnataka baksa kal·susaanggen.
Meghalaya Football dolni sak 20 kal∙susagiparang baksana Meghalaya Football Association-ni officialrangko President Hamletson Dohling re∙dilaniko dakangenga. Meghalaya dolni palo kal∙susana seoka man∙e re·anggiparangara Menangpyndap Khongjee, Medonbanshan Kurkalang, Imenstar Mawlong, Robindor Kyrsian, Nashuwa Wahlang, Alicestar Thangkhiew, Akhimra G Momin, Baniar Kharsahnoh, Mewanpyntngen Lyngkhoi, Serene Dkhar, Grandwill Kitbok Dkhar, Idamayalang Pyrtuh, Eriliting Pohshna, Banteilangki Sumer, Jindal Rasmut, Iaipynkmenlang Kharkongor, Embhahlang Biam, Hame-da-o Nongtdu, Samepaia Thangkhiew, Wanpyndap Kharkongor, Lekini Suting (Coach), Beneslaus Khyriem (Assistant Coach) aro Damehi Kyndiah (Manager) ong∙a.
