West Garo Hills-ni Chidekgre songo Legal Awareness programme cum Campaign on Opening Door for Education to Children and School Dropout-ni bidingo bi·sarangna bida budiko skie ra·na nangchongmotani bidingo mijal sal July 22 tariko ong·atangaha. Ia program-ko mongsongabte skul napanio dontonggipa bi·sarangko ma·sie ra·an baksana ua jolo mikkangchi skulrango bi·sarangni napaniko bariatna kam ka·na miksonge WGH-ni District Legal Services Authority (DLSA) aro Meghalaya State Legal Services Authority bakrime, National Legal Services Authority-ni dakchakanichi ong·atangaha.
Ia program-o DLSA-ni Legal Aid Counsel Grangchira Ch. Marak ‘Right of Children to Free and Compulsory Education Act 2009’-ni bidingo jean bilsi 6 oni 14 ong∙gipa bi·sarangna indin aro nangchongmotgipa poraia skianiko on∙a nanganiko India ni Constitution Article 21A-o pangchake ra∙gataha ine ua agantalate on∙angaha.
Ia Act-o janapanigitade bi∙sarangna poraia skianiko on∙a sorkarinigita songni sepang jolrango skulrangko kulie on∙a nanga jedakode chatro chatrirang chelgipa biaprango re∙na nanggija nanggipa poraia skianiko ra∙na amgen. Unbaksana bi∙sarangna midday meal ko on∙a nanganiko aro uamangko sasti on∙anioni naljoke rakkinaba ge∙etgimin niamranba gnang ine Marak aganangaha. Una agreba skul napanio dontonggipa bi∙sarangni bimingrangko skulo segataina ia Act-nigita cholrangba dong·a ineba Marak agandapangaha.
Legal service-ni gamchatani bidingo aro bi∙sarangni kosako kragija bewalo sasti on∙anioni naljokatna man∙anikoba Bar Association-ni Advocate Jeriko R. Marak talatangaha. Unbaksana kal∙aka man∙gipa bi∙sarangko rehabilitation centre rango dona man∙ani bidingo aro dosi dakgipa manderangko niamo pangchake sasti on∙a man∙anikoba Marak talatangaha. Ia mikrakatani program-o Chidekgre-ni Nokma aro songni manderangba dongpae bakko ra·angaha.
