South Garo Hills-ni ning·o donggipa Chokpot antioniko rongtalate chimonge dongimin soa sima jeng jabolrangko Daren chibimaona galaniko nikna man∙e jolo songdongenggipa manderang koborna parakataha. Uamangni u∙iatanigitade bajar Committee-ni ia anti bajarko rongtalatna rakkigipa manderang chimonggimin plastic, sogimin na·tok, me·su samjakrang aro gipin jabolrangko daren chibimaonasa galatenga ine aganangaha.
Bang·a songrang jekai Bibagre, Dagalgre, Rampragre, Ringkapgre aro ka·ma jolo donggipa Sibbari-ona kingking ia Daren chibimako jakkalenga. Ia songni manderang Daren chiko auna miksuna, babilsini kamna aro gipin dingtang dingtang nanganirangna jakkalenga. Iani gisepon soa sima jabolrangko chibimao galgenchimode ia chibimako jakkalenggiparangna sabisirangko on∙aba donga, mongsongbate bi·sarangna kenbegnigipa ong·enga ine songdongenggipa manderang koborna parakataha.
Iarangko janapate, Garo Hills-na pattigimin Daren chibimako rongtale rakkichina aro kragija dake chiona soa sima jabolrangko galataniko nirokchina ua Bazar Committee-rangko mol·molataha. Chibimarangko indake nosto ka·aiode chio donggipa jonturangkosan nisiataigija, manderangba mikkangchi china dilna nanggen ine mikrakanikoba ua on·atjolaha.
