Mijal sal, July 23 tariko ma·mong sorkarini Union Budget-ko chamatanio Finance Minister Nirmala Sitharaman Development of North Eastern Region (DONER) Ministry-na 2024-25 bilsina adita bariate gong 5,900 crore tangkarangko chamataha jeon re∙anggipa bilsio 5,892 crore-rangkosan chamataniko nikangaha. Unbaksana North Eastern Council (NEC)-naba adita bariate re∙anggipa bilsio gong 800 crore chamaoniko ia bilsio 820 crore-rangko chamatskaaha.
Apsan daken North East Special Infrastructure Development Scheme (NESIDS) na gong 2,491 crore tangkarangko chamangaha jeon NESIDS scheme-ni niamogita North East-ni a·dokrangrangna ma·mong sorkarinigita chu·gimik dakchakaniko on·enga. NESIDS North East-ni a·dokrangna rika cho·ani project-rangko kam ka·e on·enga jekai ringani chiko sokatani, bijoli aro rama jal·angrangko tourism-ni a·bao songsalko ra·dona, poraia skiani aro sanna bannani a·barango nangchongmotanirangko on·e dakchakenga.
PM-DevINE scheme-na gong 2,200 crore-rangko chamangaha jean ia scheme-ni mongsonggipa miksonganiara rika cho·anirangchi dakchake PM GatiShakti-o pangchake North East-o mai a·bao nanganirangko nigrike songsalko tang·doatna chadambe aro me·chikrangna janggi tangna dake cha·na cholko on·e dingtang dingtang a·bao kolgapatna dakchakenga. Ia scheme-ko Central Ministry rang, North Eastern Council ba a·dok sorkarirang project ge·prakko agency-rangko nigrike kamrangko ka·enga.
North East Enterprise Development Scheme (NEEDS)-naba gong 70 crore-ona bariataha jean skanggipa chasongni entrepreneur-rang jemangan apsan gadango badingna sokdopagijagiparangna scheme-rangko on·e dakchakenga. Unbaksana NEEDS chonchongipa Enterprise-rang jean gital project-rangko a·bachenggiparangna, bariatna aro donsogimin unit-rangko chasong gitalni kolrangko jakkalna dakchakaniko on·enga.
Iani gisepon North East-ni a·dokrango India Post Payment Bank (IPPB)-rangko ge 100 branch-rangko a·bachengatanikoba parakangaha. IPPB Department of Posts, Ministry of Communication-ni ning·o a·bachenggipa ong·a jekon ma·mong sorkari chu·gimik jako ra·e chalaienga aro tangka paisanigita dakchakna jakkalbaenggipa aro digital banking service-rangko manderangna on∙angenga.
