Meghalaya a∙doko reservation policy-ni bidingo manderangni ku·pattianirangko ra·chakna expert committee August 13 tarikona ra·doataha. Re·anggipa changoba ku·pattianirangko ra·chakangkuna miksonge July 14 tarikona ra·doataha. Iani gisepon, gitcham Justice aro Expert Committee-ni Chairman Mool Chand Garg, bon·kame dingtang dingtang manderangoni ku·pattianiko man·sonagita tarikko dingtangatangaha.
Da·o dipet, bang·a manderang chong·motan GHADC-ni dilgiparang, NGO dolrang, senior citizen, social activist, aro uandake dingtang dingtang gadango dangdike on·enggiparang expert committee-na ku·pattianirangko batanggimin salrangko pakwatangaha. August 13 tariko manderangni reservation policy-ni bidingo ku·pattianirangko ra·chakmanani ja·manosa Public Hearing-na tarikrangko parakatgen ine u·iataha.
