Batanggimin May 6 tariko Shillong Mawlai Polytechnic-o 4 gipa semester-ko poraigipa Tura Dakopgre-ni chatri Diana Dimre Ch. Marak uni hostel-o an·tangko kae siani bidingo, Garo Hills-ni adita NGO dolrang re·ange FKJGP dolni President Pritam Areng-ni dilanichi East Khasi Hills-ni DC RM Kurbah-ko gronge nambate am·sandianiko dakchina didiangaha.
NGO dolrangni chittio janapatanigitade, sianggipani dingtang dingtang be∙enni bakrango an∙chi kamani dagirang donga. Unbaksana porairimgipaskarangni uni kosako matnangani a·sel gisiknigita neng·nikanirangko man·e salgipino an·tangko kae siaha ine janapangaha. Una agreba Manggisio mata bu·anirangko porikka ra·ani report-ko anti gni-ni ja·manon mahari ma·drangrangni jakona sokataha ineba Pritam janapataha.
Ia ong·a obostani bidingo ma·drang maharina kakket bichalko ra·bana man·agita EKH a·jani DC RM Kurbah-ko gronge court-nigita name am·sandianiko dakchina NGO dolrang mol·molangaha.
