Mijal salni bako, Autonomous District Council (ADC) ge 10 ni dilgiparang skotong songjinma New Delhi-ona re·ange Union Home Minister Amit Shah-ko grongeaha. Ia ge 10 Autonomous District Council-ni dilgiparang India-ni Constitution-o Sixth Schedule-ko ra·gatanio neng·nikani aro nangnikani bidingo agan-golpogrikangaha. Indake ong·engon uamangni janapgimin neng·nikanirangko jasani gisepon kamrangko ka·e on·a Union Home Minister tik ka·angaha.
Ia Sixth Schedule-ko Constitution-o ra·gataniko, Union Minister of State-ni dilanio dongimin committee-rang parakataniko dakanggen ine KHADC-ni CEM Pyniaid Sing Syiem aganangaha. Ge 10 Autonomous District Council-o dingtang dingtang neng·nikani aro nangnikanirang gnang jekon iarangni bidingo Union Minister baksa agan-golporime chanchirimangaha ine Syiem parakataha. Unbaksana ia ge 10 Autonomous District Council-ni dilgiparang re·baenggipa August 10 tariko ADC-rangko bilakbatatnagita Shillong songjinmao tom·e chanchirimanggen ineba Syiem aganangaha.
Home Minister jasani gisepon janapgimin pilak neng·nikanirangko knachake nirokatna ku·chakanina namen katchabea aro ka·donganiko man·aha ine Indigenous Regional Alliance-ni Chairman Pradyot Manikya Deb Barma aganangaha. Unbaksa Sixth Schedule-ko Constitution-o ra∙gatna man∙a ka∙donganiko agane, batanggimin somoirango je party-ba ma∙mong sorkariko chalaichina, ku∙chakgiminko A∙songni sokari ong∙anigimin chu∙sokatna nangao ga∙aka ineba Deb Barma aganangaha.
