Rongjeng Forest sub-beat-o chimonge dongimin gitcham bolrangko palatani gisepon dak ka∙e man∙anggiparang Rongjeng Forest sub-beat-oniko ra∙anggija, Rongjeng Forest Range-ni ning·o ong∙gipa Rongjeng Dambo reserve aro Darugre reserve-oniko niamni a·palo tange dongenggipa bolrangkosa de∙ne ra∙angengani gimin A∙chik Organization for Social Welfare (AOSW) dolrang Rongjeng Forest Range Officer-ni kosako Williamnagar, Division Forest Officer-na chitti see u∙iatangaha.
Battanggimin somoio Rongjeng Forest sub-beat-o chimonge donenggipa gitcham bolrangko on∙atani pal Rongjeng Dambo reserve aro Darugre reserve-oniko tange dongenggipa bolrangko den·e gari truck bol 6 mangnigita department-ni nikaon sale ra∙anganiko niknagita man∙angaha. Indake ong∙enggon Rongjeng Forest sub-beat-o DR/lot 7 & 8 rangko da∙onaba chimonge donenganiko niknagita man∙kuenga ine AOSW dol janapataha. Ia kamko ka∙aniara niamko pe∙ani ong∙an baksana Department-ko botnam ka∙ani ong∙a aro Range Officer-ni kosako raka ja∙kuko de∙e am∙sandianirangko dakangna nanga ine AOSW dol janapangaha.
Apsandaken ia kamko ka∙anira A·chik a∙songni gamjinko nisiani ong∙an baksana a∙dokni kajina man∙gniko gimaataniba ong∙a ine aganangaha. Una agreba indake niamgri tange dongenggipa bolrangko pale cha∙anina Rongjeng Forest Range Officer-ni kosako nanggipaa ja∙kurangko de∙e aganchakanirangko on·china AOSW Williamnagar-ni DFO-ko didiangaha.
