SGH Gasuapara jolo ramarangko tik ong·e tarijaenganina aro Dimapara-oni Deku antidam-ona re·gipa ramako tariani namjan baksana adita culvert-rangko tarigija galchanganina FKJGP Gasuapara circle-ni Kalsrang Marak PWD (NH) office-ni SDO-ona suk ong·gijaniko chitte see u·iatangaha. Uni chittio janapatanigitade, Dimapara-oni Deku antidam-ona gital tarigipa ramako matchotaoni ja gittamsan ong·kuengoba da·on nosto ong·anirangko nikna man·engaha. Unbaksana ramako tarirongbewalo tarijaha aro ga·nanggija tariaha ine janapataha.
Ia ramako tarianio algatrako anna skang name rongtale sapa ka·jahani a·selo aro roller-ko jakkale ramako jetani somoio tik ong·e jetani a·selo ramarang ga·nangjaha. Apsandaken ramarango chi joksotna culvert-rangko tarijan baksana gitcham culvert-rangkoba taridapgija galchangani a·selo niknagita man·jaha ine Marak janapataha.
Una agreba mitam nanggipa biaprango retaining wall-rangko kajani gimin wachi karini somoio a·arang ruronganiko nikna man·enga jeni a·selan salantio nangana bajar anti re·gipa manderangna aro skulrangchi re·enggipa chatro chatrirangna neng·nikanikoba on·enga ine janapataha.
Ia gimik obostarangko nirokate nanggipa kamrangko ka·e ramako tarianio namgijanirangko, galachanggipa culvert-rangko taridaptaie, nanggipa biaprango culvert-ko on·dape aro a·a rurongronggipa biaprango retaining wall-rangko kae on·china PWD-ni SDO-ko mol·molangaha.
