Tura-oni Dalu-ona re·gipa ramao Tura songjinmaoni adita re·ange man·gipa Dobasipara petrol pump jolo mikka jimbee waanichi retaining wall be·wake ramao a·arang ru·rongdape re·ruragipa manderangna kenchakani ong·enganina A·chik State People’s Front (ASPF) dol PWD Tura Divison-ni Executive Engineer-na chitti see u·iatangaha.
Ia a·a ru·rongdapgipa rama turning ong·an baksana mikkangchi re·baenggipako niksona man·gijagipa ong·e salantio re·ruraenggipa mande aro gari gora salgiparangna namen kenbegni ong·enga ineba ASPF dolrang janapangaha. Indake ong·enganina ia pilak kenbegnigipa a·sel ong·gnioni naljokna man·agita nirokate ia ramao ru·rongdape dongenggipa a·arangko ta·rake ragale galchina ASPF dol PWD-ni Executive Engineer-ko mol·molangaha.
