A·dokni gital Governor Chandrashekar H Vijayashankar da·al attamni 4:30 bajio Governor-ni kamko jako ra·e ka·nagita ku·mikchetna tik ka·angaha. Ia ku·mikchetaniko Meghalaya High Court-ni Chief Justice Vaidyanathan-ni dilanichi Raj Bavan-o dakanggen.
Mijal salni bako a·dokni gitcham Governor Phagu Chauhan-ko a·dokna name dangdike on·anina aro bang·a namgnirangko ra·baanina uko mande ra·an baksana gisik ra·nagita bang·a boksisrangko on·e bon·kame watgrikaniko dakangaha. Chauhan ia bon·kamgipa salo uni Governor ong·e kamko ka·miting somoio una dakchakanirangko on·anina Raj Bhavan-o pilak dangdike on·enggiparangko mittelpilangskaaha.
Apsandaken dingtang dingtang department-ni officer-rangba uni ru·uta bilsirangna a·dokna dangdike on·anina aro namgipa kamrangna mande ra·e rasongko on·an baksana de·mittelangaha.
