A·dokni sak 1037 SSA non-teaching staff-rang uamangni dormaharangko 25 percent bariatna sorkarini tik ka·aniko jegale 80 percent-ko bariatchina dabianiko dakangkuna tik ka·angaha. Uamangni dormaharangko bariatnagita State Project Director, Samagra Shiksha (SEMAM) aro Director of School Education and Literacy, Meghalaya July ni 26 tariko parakataha.
A·dok sorkari SSA Non-Teaching Staff-rangni dormaharangko 25% ona bariatanio gong 3.19 crore tangkarangko nangdapgen ine parakangaha. Education department-ni u·iatanigitade uamangna 25% ona bariaton ia bilsina chamgimin gong 12.78 crore-oni gong 15.98 crore-ona tang·doanggenok ine aganaha.
Iani gisepon Shillong Malki kal·chakram biapo SSA non-teaching staff jinma tom·e jingjengatenggiparang 25% ona bariataniko jegale 80% ona bariatchina dabiangkuna tik ka·angaha. Sorkarini 25% ona bariatna tik ka·ani lekkarangko man·sogenchimoba, batanggimin somoio uamangni tom·e chanchirimanio 80% ona bariatna nanga baksana bilsiantin 5% bariatna nanga ine tik ka·gimino pangchake ra·chakjaha maina 2016 bilsio bariataonin da·onaba bariata dongkuja ine All Meghalaya SSA Non Teaching Staff Association (AMSSANTSA) ni finance secretary Ricky Shullai aganangaha. Unbaksana uamangni dabianiko a·dok sorkari on·kujana kingking dontonggija jingjengataniko dakangkuaigen ineba Shullai agandapangaha.
Malki kal·chakramo jingjengatenggipa SSA-o kam ka·enggiparangko Commissioner aro Secretary Vijay Mantri re·ange gronge uamangni dabianirangko Chief Minister-ona sokataha ine Mantri aganangaha. Iani bidingo kamrangko ka·nagita CM bakan officer-rang baksa tom·e chanchirimangaha aro uamangni dabianiko sorkari ta·rake nirokatnaba u·iatangaha ineba Mantri aganangaha.
