Re·anggipa salrango manderangni namnike seokgimin ACHIK dolni President Thomas M. Marak-ko kakketgija aro maming u·iatagri uni kamoniko ra·galanina bakrimgimin Tikrikilla unit-ni ning·o ong·gipa Rajabala, Selsela, Tikrikilla, Nidanpur baksana Dadenggre, Babadam, Nongal, Baghmara, Rongmil Unit-rangni ACHIK dolrang ku·monge jegalangaha. Ia kamko ka·aniara democratic-ni dongimin niamrangko pe·ani aro bil gnanggipa dilgiparangni kosako kam ka·ani ong·a ine NGO dol janapangaha.
Marak-ko President-ni kamoniko ra·galanira kakketgipa dilgipa aro A·chikrangni bilna kam ka·anio, kamrangko galchanggija aro kamtangko gisiko nange ka·engani kosako politics-nigita milegrikgijanio democracy-o pangchake kakket bichalna dabigiparangko ra·galani ong·a. Ian manderangni gisiko miknenganiko ra·baani aro manderangni ku·monge kamoniko ra·galna ku·rang on·e joton ka·anisa ong·a ine NGO dolrang aganangaha.
Indake Marak-ko kamoniko ra·galanio kakketgipa sakkirangko on·china, kakket am·sandianiko dake chong·motgipa a·selrangko mesokchinagita NGO dolrang dabiangaha. A·dokni aro ACHIK dolni manderang uamangni dilgipako mangsongani gnang kragija dakanina jrip dongna man·jan baksana uamang kakket bichalna ku·rang on·angkugen aro manderangni democratic-ni bilna dakgrikangkugen ine NGO dolrang raken aganangaha.
