Da·al salni bako West Garo Hills, Dalu songo Maharashtra a·dokoni Ayurvedic samrangko palna re·bagipa manderangko, A·chik Holistic Awakening Movement (AHAM) Dalu Regional unit, Garoland State Movement Committee (GSMC) aro A·chik Youth Welfare Organisation (AYWO) Dalu Regional unit dolgitam bakrime uamangko re·angpilchina ge·etangaha. Ia biapo uamang a·dam dake nok rike samrangko palna miksonganirang gnang ine koborna parakataha.
NGO rangni talatanigitade ia samrangko palna uamango maming bading chiwalani trade licence, GHADC ni Provisional tax aro Trading by Non-Tribal (TNT) certificate-rang dongja ine u·iataha. Batanggimin somoio indakgipa obostarangko champengna a·dokni Director General of Police (DGP) na AHAM dal anti-infiltration ba napsrukbaaniko nirok simsakna police dolrangko donchina mol·molangaha. Chittirangko see u·iatgenchimoba mamung ja·kurangko de·ani dongkuja ine AHAM dol parakangaha.
Indake gipin a·dokni gipin jatrang Garo Hills-ona mamung pangchakani gri bading chiwalna re·bagiparangko nanga ja·kurangko de·e nirok simsakaniko dakchina GHADC ni Executive Member-rangko uamang didiangaha. Iani gisepon GHADC Executive Member-rang, MDC-rang aro Nokma Association-rangko gipin a·dokoni mamung pangchakani gri napsruke bading chiwalgiparangko champengnagita tarake chanchirime apsan bakrime nanga ja·kurangko de·e kamko ka·na ine NGO dolrang ku·monganiko dakangaha.
