South Garo Hills Asokgre songo mobile network-ko watanirang tik ong·jani a·selo songdongenggipa manderang neng·nikanirangko man·e ta·rake nirokatchina a·jani Deputy Commissioner-na chitti see mol·molataha.
Batanggimin salrango Asokgre songni manderang km 3.5 ong·e chel·ao donggipa Gittinggre songni Airtel/Jio tower-ni network-rangko jakkalana man·genchimoba re·anggipa June jaonide network-rangko tik ong·gija watani a·selo bang·a neng·nikanirangko chagrongna nangao ga·akengaha ine songdongenggipa manderang janapangaha. Indake network-rangko man·jaengani a·selo office-ni nangana kamrangko ka·enggiparangsan ong·aigija bang·a chatro chatrirang jemangan online-gita poraienggiparangba namen neng·nikaniko chagrongenga ineba chittio janapataha.
Iani gisepon network-ko watani tik ong·jaenganina battanggimin salrangonin network-ko watgiparangna changni chang aganmanahaoba maming nirokate kamrangko ka·ani dongkuja ine uamang agandapangaha. Ia pilak manderangni chagrongenggipa neng·nikanirangko naljokatna nanggipa ja·kurangko de·e nirokate network wataniko namdapate on·china Asokgre songni manderang a·jani DC-ko mol·molangaha.
