Reservation policy aro roster system-o pangchake a·doko kamrangko tikatenganiko nirok simsakna bang·a NGO dolrang baksa bakrime bikotgipa Garo Reservation Policy Coordination Committee (GRPCC) dingtang mancha MPSC-oniko talatanirangko on·china didiataha. Batanggimin July 28 tariko kamna advertise nakatgipao Home (Police Department)-ni ning·o Meghalaya Police Service (MPS)-na rimnapani bidingo dakronggijanirang ba ong·ronggijaniko GRPCC parakataha.
Ia kamrangna rimnapanio, para 8-ko ja·rikna nanga aro clause V (e) o personal interview-na aganani gnang jeon screening test/screening practical test/written examination-rangni result-ko man·on kragipa candidate-rangko personal interview-ko on·a okamna nanga. 2017 July 28 tariko commission-ni tik ka·anigita kamrang nakatani kri 1:10 oni 1:2.5 ratio dake rakkina nangao ga·aka.
Indake ong·genchimoba MPS kamna rimnapanio u·ianigitade, chu·gimik 1410 manderangoni 254 candidate-rangsan 2023 December 17 tariko ong·atgipa prelim porikkao chu·sokangaha jekon 2023 August 29 tariko result-rangko parakataha. Ia sak 254 candidate-rangoni main porikkako see 2024 July 25 tariko parakatgipa result-o sak 27 kosan personal interview-ko on·a seokaha.
Advertisement no. MPSC/ADVT-38/1/2019-2020/48, 2019 August 2 tariko nakatanigitade aro ia advertisement-ni ning·o para 8 clause V (e)-ni donggimin ratio-o pangchake batbegipa sak 42 candidate-rangko personal interview-na ra·na nangao ga·aka. Ia ratio-o pangchake ge 7 kamrangna (ge 1 sports person) personal interview-ko Garorangna 17/18 on·a nanga. Indake ong·genchimoba chu·gimik sak 27 kosan ra·ahani gimin ge 7 kamrango baita sak Garorangko bang·gija seoka man·giparangoni rimnapanggen ine GRPCC dolni Assistant General Secretary Bernita R Marak jajrenganiko parakataha.
MPSC, batanggimin changogita, ia changoba talgija aro Garorangni gisepo kragipa candidate-rang dongja ine aganchakaniko on∙taigenma. Ian uamangni dongimin ratio-ko ja·rikgijani ong·gen aro seokanio donnue dakani ong·gen ine Marak sing·doangaha.
