NGH Bajengdoba Regional Unit-ni Achik Progressive Approach (APA) dolrang Didram chibimako batsotna tarigipa dolongko matchote tarigija galchipe donenganina PWD Department-ni Executive Engineer, Sub-Divisional Officer, Resubelpara-ni MLA Timothy D Shira aro Mendipathar-ni gitcham MLA Benistand G. Momin-na chittiko seataha.
Bang·a kamrangko ka·nagita MLA-rang ja·ku de·e contractor-rangna on·genchimoba, kamrangko matchote ka·gija galchipe donani a·selo songdongenggipa manderangna ka·dongani gri ong·aha ine APA dolrang aganangaha. Ia Didram chibimako batsotna tarigipa dolongko tarina indita crore tangkarangko jakkalgenchimoba dolongko namgija obostaona sokate galchipe donaha ine janapataha.
Ia project-ko 2003 bilsion Mendipathar-ni gitcham MLA B G. Momin-ni somoio a·bachengataha jekon da·o Resubelpara-ni MLA T D. Shira jako ra·rikahaoba dolongko matchotatgija donchipenga ine APA dolrang aganangaha. Ia dolongko matchote tarie on·jani a·selo adita songni manderang jekai Thorika Nalsa, Thorika Kona Garo, Thorika Kantabari, Nebari aro Thorika Rabha songrang bang·a neng·nikanirangko chagrongna nangao ga·akenga ine janapataha.
Apsandaken NGH Wageasi aro uni wilwilao donggipa songrang chong·motan Upper Wageasi, New Wageasi, Wageasi Songma aro Balnanggre (Satmile)-o sorkarini chamatgimin Jal Jevan Mission (JJM)-ni kamrangko tik ong·e ka·gija galchipe donenganina, Dainadubi Regional Unit-ni APA dolrangba jegalataha.
Indake SDO-ni simsak nirokgijanina aro manderangni namgnina chamatgipa tangkarangko jakkalsretanina jako ra·e kamrangko ka·enggipa officer-rangni kosako matnangataha. Iani gisepon janapgimin songrango JJM-ni kamrangko name matchote ka·e on·china aro simsakgija galchipe donenggipa official-rangni kosako sinjetaniko on·china Dainadubi APA dolrang didiangaha.
APA dolrangni janapatgimin kamrangni bidingo songdongenggipa manderangni namgnina daito donggipa dilgiparang nirok simsakate Didram dolongko aro Wageasi JJM project-ko name matchotate kam ka∙e on·china daito donggipa dilgiparangko mol·molangaha.
