Rerapara Block ni ning·o ong·gipa Gonglanggre oni Rerapara ona 33 KV bijolini silitingko sringa matchotahani gimin August jani 3 oni 8 tarik ona wate nianiko dakangnagita MePDCL u·iatangaha. Ia 33 KV bijolini silitingrangko Rerapara Block-ni ning·o ong·gipa adita song nokranggita sringaniko dakaha jean Gonglanggre, Balnanggre, Goramara, Asinagre, Harigoan, Mukdanggra Ghatgre, Dorambokgre, Jewilgre, Balalgre, Chimisenggre, Damalgre, Rerapara aro gipin songrang ong·a. Iani gisepon janapgimin songrango songdongenggipa manderangko bijolini siltongrangko dangtapjachina, matchu-matte ba pilak jila ka·anirangko bijolini siltongo aro silitingni ka·mao ba sepang jolo kajachina raken beng·aniko MePDCL u·iatangaha.
Ia beng·aniko ba u·iataniko manigija maiba a·selo ga·akgenchimode MePDCL mamung daitoko ra·jawa ineba u·iatangaha. Ia bijoli silitingrang maibakai a·ao ga·akako niko ba banoba wa·al kamaniko ba gamaniko knaode sepango line-man donggiparangna ba MePDCL ni office ona kobor ko on·china gitaba didiangaha.
Ia Gonglanggre oni Rerapara ona 33 KV bijoliko watanio chu·sokgipa ong·ode bijoli ko watkamna man·gen aro gitalgipa 33 KV/11KV Rerapara Sub-station oni bijoli wataniko a·bachengatanggen aro ian Rerapara aro adita songrango bijoli ni gimin manderangna jajrenganiko olgrokatani ong·gen ine MePDCL parakangaha.
