WGH Selsella-Balachanda ramarang nosto ong·engahanina aro ramarang apchangketanina, Bhutan a·songoni salbaenggipa truck garirangko dongtongatchina Selsella aro Balachanda jolni nangrimgimin NGO-rang chong·motan FKJGP, ASWA, GSU, GSMC dolrang bakrime a·jani DC-na chitti see didiataha.
Batanggimin salrango ia ramako taridapnagita sorkarina bang·a dorgastorangko on·manahaoba taridapna maming ja·ku de·anirang dong·kuja ine NGO dolrang janapataha. Uamangni truck garirangni re·ruraaniko champengatna miksonganiara jolo songdongenggipa manderangko naljoke rakkina aro ramarangni nosto ong·dapaniko komiatna ong·a.
Unbaksana Selsella ramako jakkalna on·engani gisepon ramarangni bate nosto ong·roroaniko niknagita man·enga jeon Konachar RCC naptomaha ine janapangaha. Ia rama gipin chonchongipa garirang re·ruranagitasan choliaigipa ong·a jeon dal·dalgipa truck garirangko re·rurana on·jachina raken beng·ataniko a·jani DC-na u·iataha aro iani bidingo nanggipa ja·kurangko de·e nirokatchinagitaba NGO dolrang mol·molangaha.
