SWGH Monabari Outpost-ni UBSI Arpheus N. Sangma-ko gipin biapona watatna ge·etaniko u·ina man·e, jolni adita NGO, Nokma, Self Help Group, VO aro songdongenggipa pilak manderang Monabari-o tom·e chanchirime gipin biapona watatna ge·etaniko ra·galchina raken jegalangaha.
Uamangni agananigitade, Sangma saksa ua jolni manderangna aro songsalna bimchipe dangdike on·gipa officer ong·a. Iani gisepon Sangma-ko niamni a·palo namgijagipa kamrangko ka·enga ine pote uko gipin biapchi watatna am·enganiko uamang ra·chakna man·jawa ine aganangaha. Monabari Outpost-ni ning·o song dam 12-rangko man·a jeon uni bimchipe dangdike on·enganiko man·e uko gipin biapchina watatode songdongenggipa manderangna gimaani ong·gen ine aganangaha.
Unbaksana Sangma-ko gipin biapchi watatna ge·etaniko ra·galpilchina re·baenggipa antio a·dokni CM Conrad Sangma-ko gronge iani bidingo nirokatchina didianggen ineba uamang janapangaha. Una agreba Sangma-ni jolni manderangni namgnina kakket bichalko ra·bae on·e neng·takgija jotton ka·e kam ka·engani kosako kragijagipa kamrangko ka·enga ine pote gipin biapchi watatna am·enganina ku·rang on·anggen ineba uamang aganangaha.
