Manderangni namnike seokgimin ACHIK dolni President Thomas M. Marak-ko kakketgija aro maming u·iatagri uni kamoniko ra·galanina ACHIK Tura Women’s Wing Dajegre, Rengdenggre aro Rongronggre Unit-rang bakrime raken jegalataha. Ia kamko ka·aniara democratic-ni dongimin niamrangko pe·ani aro bil gnanggipa dilgiparangni kosako kam ka·ani ong·a ine uamang janapangaha.
Marak-ko President-ni kamoniko ra·galanira kakketgipa dilgipa aro A·chikrangni bilna kam ka·anio, kamrangko galchanggija aro kamtangko gisiko nange ka·engani kosako politics-nigita milegrikgijanio democracy-o pangchake kakket bichalna dabigiparangko ra·galani ong·a. Ian manderangni gisiko miknenganiko ra·baani aro manderangni ku·monge kamoniko ra·galna ku·rang on·e joton ka·anisa ong·a ine Women’s Wing dolrang aganangaha.
Indake President-ko ra·galani bidingo chu·gimik talataniko on·china u·iatangan baksana ia mamlani bidingo name am·sandianirangko dakchina aro uko President-ni kamo donpilkujaenganina talataniko on·china ACHIK Tura Women’s Wing dolrang dabiangaha.
