Sukrobar sal, August 2 tariko Garobadha-o bilsi chu·ongkugijagipa me·chik bi·sani kosako kragija kamrangko ka·aniko knae, songdongenggipa manderang aro West Garo Hills District Police dolrang ia ong∙anggipa obostani bidingo am∙sandianiko dakangenga ine parakataha. Dosiko dakgipa mande da∙o dipet gipin biapchi kate chakenga ine u∙ina man∙aha aro iani bidingo Tura Women Police Station-o mokordomako ka∙angaha ineba pulis dolrang koborna parakataha.
Ia dosi dakgipa mandeko ta∙raken rim∙nagita pulis dolrang kamrangko ka∙angenga ine janapatan baksana a∙selo jang·nanggipa me∙chik bi∙sana kakket bichalko ra∙bae mikkangchi indakgipa obostarango chagrongaoniko naljokatna kamrangko ka∙angna miksonganikoba aganangaha. Unbaksana pilak manderangni ia obostako jinmana parakatanina mittelangan baksana pulis dolrangna am∙sandianiko dakna pakwatchinaba didiangjolangaha.
