Da∙al salni bako Williamnagar-ni A∙chik Progress Approach (APA) Central Executive Body, dolrang East Garo Hills a∙jani adita songrango Jal Jeevan Mission (JJM) scheme-ni kamko ka∙aniko chu·sokatgija matchotaha ine parakatanina Simsangre Division-ni Sub Division Officer (PHE)-na aro In-charge (JE) na chitti see u∙iatangaha.
APA dolni janapatanigitade, EGH a∙jani adita songrango nokona chi pipe sale on∙aniko dakgenchimoba bang·a nokdangrango ia pipe-gita chirang jokkujaenga aro chi pipe sale on∙anio Jamge A songni adita nokdangrangko watchangangaha ine janapangaha. Batanggimin somoio indakgipa obostako chagrongenggipa nokdangrang iani bidingo department-na u∙iatanirangko dakahaoba maming ja∙ku de∙anirang dongkuja ineba APA dol janapataha.
Indake ong∙engon obostako chagrongenggipa songni nokni manderangni neng·nikanirangko olgrokatna man∙agita nanggipa ja∙kurangko de∙e ta·rake kamrangko ka∙e on∙china APA dolrang PHE-ni SDO aro JE-ko mol∙molangaha.
