Re·anggipa 2020 bilsio ma·mong sorkarioni, East Garo Hills a·jani Dorengkigre songona chamatgimin gong lakh 77-ni project-rangko kam ka·gija donanina Tenten Ch. Marak sakanti songdongenggipani palo Divisional Soil & Water Conservation Officer, Project Manager-na see raken sing·doaniko dakataha. Ia project-ko songgitamna suale ka·na lakh-ni lakh tangka paisarangko chamatahaoba kam ka·ani namen komikuenga.
Dorengkigre-na ia project-ni ning·o chamatgimin tangkarangchi bolrangko ge·na, digirangko tarina, RCC footbridge, champengani pakmarangko ka·na, trenching, spring chamber, CC check dam, bite nanggipa bolrangko ge·na, food processing, Tailoring, Piggery, Piggery shed, CC core wall aro gipin nanggipa kamrangko ka·na tikataha.
Ia kamrangko ka·na tikatgimin project-ni tangkarangko sawa mancha jakkalsretaha ine sing·doaniko dakangaha. Songni manderangni namgnina department ia kamrangko ka·kujaenga aro maidake saksa sakgni officer-rangsan ia project-ni namgniko man·enga ine bang·a sing·doaniko Divisional Soil & Water Conservation Officer aro Project Manager-na janapataha. Dorengkigre aro wilwilao donggipa songtangni manderang ia project-ni namgniko man·china ta·rake kam ka·china, kam ka·anio kakket ong·e parake dakchina aro daito gnanggipa officerrangko gisiko nange jako ra·china uamang didiataha.
Batanggimin somoio Nokma an·tangan ia a·ako department na indin on·genchimoba projectrangko matchote ka·jaode aro joltangni manderangna namgniko man·kuja dipet chotchanggija ku·rang on·angkuaigen ine Marak parakangaha.
