Bangladesh a·songo so·sojengjeng ong·engani gisepon a·songni a·palchini namgija kamko ka·giparang, badingsrukgiparang aro gipin niamni a·palo kamko ka·giparang Garo Hills-ni sima ari jolo ong·gija kamrangko ka·na ken·chaksoani donganina, SWGH a·jani District Magistrate Hema Nayak Section 163 BNSS niamo pangchake India-Bangladesh sima arini metre 200 mangnigita chel·e attam 6 bajioni pring 6 bajiona Jolo songdongenggipa manderangko re·rurajachinagita ge·etangaha.
Iani gisepon gipin a·songni namgijagipa kamrangko ka·giparang cholrangko am·e walni somoio a·dokni matchu mate ba pekatgipa samrang jekai phensidyl, Yaba tabs ba ganja-rangko sima ari jolo badingsrukna jotton ka·naba gnang ine DM Nayak u·iatangaha. Iarangsan ong·aigija uamang sima ario nirokenggipa BSF dolrangko saknaatnagita matsramgipa silchidarerang, petrol bomb, boma aro gol·dikrangko jakkalanaba donga ineba DM Nayak mikrakataniko on·angaha.
Una agreba walni somoio Terrorist ba bobil dake chakatgipa dolrang a·songni sima arigita napdrana jotton ka·na am·engani bidingo u·iatsamsoaniko man·e iarangko chel·chaksona nanggipa ja·kurangko de·e kamrangko ka·chinagitaba SWGH-ni DM Hema Nayak didiangaha.
