North Garo Hills Bajengdoba Block-ni ning·o ong·gipa Chiramgre Government Lower Primary skul nokni obosta namen namjabeani a·selo skul ka·anio namen neng·nikaniko man·enga ine koborna parakataha.
Ia skul nokni bidingo koborko man·soanigitade Chiramgre LP skul nok namen namjabee nokkingrang napongani a·selo wachi karini somoio mikkarang wagenchimode bi·sarangna skianiko dontongna nangao ga·akenga ine janapataha. Unbaksana jadokni porikkako ra·ani somoio anti gimikna mikka waanichi porikkako dontongatna nangaonaba sokpilaha ineba u·iatangaha.
Indakgipa obostarangko chagrongna nange jolni poraigipa bi·sarangna namen neng·nikaniko on·an baksana uamangni poraiani gadango ja·manchakaniba ong·enga. Iani gisepon poraienggipa bi·sarangna poraie skie ra·ani a·bao nambata cholko on·a man·agita Chiramgre Govt. LP School-ko ta·rake taridape on·china songni manderangni palo A·CHIK State Peoples’ Front (ASPF) dolrang Education Minister-ko mol·molangaha.
