North Garo Hills a·jao sorkari officer-rangko ru·utgija somoirangna kam ka·ani gisepon apjitatrongengani a·selo a·jana namgijaniko ra·baskaenga ine Meghalaya Pradesh Youth Congress-ni Vice President, Timjim K. Momin aganangaha. Ian adita MLA-rangni namgijagipa bewal aro sinjetna jotton ka·anichi namnamgipa officer-rangko gipin biapchi apjitatenga ine Momin parakataha.
Iarangni a·selo NGH a·jao kam ka·na officer-rang kusi ong·gijaniko man·a aro indake dakanichin a·jani manderangba gisik a·ning bite kam ka·na sapgipa DC, ADC, AEC rang aro namgipa chanchianirang donggipa gipin officer-rangni namgniko man·rongja ine Momin janapataha.
NGH a·jao nirok simsakna nangenggipa poraia skiani a·ba mingsa ong·a jekon gitcham Deputy Commissioner, Mitali Chandra dingtang mancha gisiko nange kam ka·angna jotton ka·aha. Indake ong·genchimoba, a·jana dingtanganiko ra·bana chanchienggipa gitcham DC-ko politics-nigita sinjetaniko man·e gipin biapchi apjitataha aro ian NGH-ni mikkangchi silroro namroroanina dal·bea gimaani ong·a ine Momin aganangaha.
Ua pora skiani a·bao Mission Education program-ko name chu·sokatna skul re·ako dontonggipa bi·sarangko am·sandie kangal cholgri nokdangrangna koros gri poraina cholko on·a miksonga gnang. Gipin kamrang jekai online mock test-rangko ong·atani aro ma·apa, bi·sarang aro teacher baksa u·i ma·sigrikgijaniko kolgapatna gitcham DC mingnamgipa kamrangko ka·angaha ine Momin parakataha.
A·jao minggipin ja·manchakenggipa kamara Greater Urban Water Supply Scheme ong·a jekon gipin a·jarango kam ka·ahaoba NGH-o ia scheme-ko ka·e on·jaha. Iani a·selo songjinmao china dilaniko chagrongenga ine Momin agandapangaha.
Bang·a officer-rang a·jao employment sector-ko namdapatna skani donggenchimoba adita MLA-rangni gaora de·anian uamangni nama miksonganirangko aro kam ka·na skaniko ra·onata. Adita MLA-rangni education system-ko kal·akna jotton ka·anian mikkangchi a·jana kenbegnigipa ong·nasienga ine Momin aganangaha. NGH-ni adita MLA rangni namgijagipa bewalni a·selo a·jani silroro namroroaniko nosto ka·anio jajrengani ong·a ine Momin agandapangaha.
