Meghalaya Public Service Commission (MPSC)-ni re·anggipa bilsini November 4 tariko Meghalaya Civil Service (MCS) preliminary porikkako segiparangni result-ko parakatanio mikkang nitee kamrangko ka∙angaha ine nike dingtang dingtang NGO dolrang candidaterangni man∙gipa mark-rangko parakatna dabiangaha. Ia dolrang aro mongsongbate KSU-ni jingjengataniko man∙e MPSC knachakna nangaona gaake mark-rangko mijal salni bako parakangaha. Unbaksana MCS preliminary porikkani minggittam singanirango ong∙gija gatataninaba MPSC-ni Website-o talatanikoba on∙angaha.
MCS preliminary porikkani result-ko December 15, 2023 bilsio parakaniko dakangaha jeon jasni ni ja∙man adita candidaterangni pass ka∙aniko parakatskaaha jean mains porikkana jagni skang mangmang ong·a ine janapangaha. Indake ong·enggon ia kamrangko ra·chakna man·jae bang∙a dolrang, porikka segiparangko kalake roan baksana kakketgija kam ka·ani ong·a ine jegalangaha.
Indakgipa kamrangko ka·aniara candidate-rangna ka∙donganiko komiatan baksana mikkang nitee niamni a∙palo kam ka∙ani ong∙a ine jegalangaha. MCS preliminary porikkako segiparangni mark-rangko aro minggittam singanirango dakgualani bidingo MPSC ni Chairman Pual Reader Marwein baksa KSU dolrangni tom·e chanchirimani ja∙man konta 24 ni gisepon parakatna tik ka·angaha.
