Meghalaya Junior & Sub-Junior State Boxing Championship 2024-ko Meghalaya-ni skotong Shillong songjinmao August 7 oni 9 tarikona ong·atanggipao a·dokni dingtang dingtang a·jarangni boxing kal·gipa chadamberang bakko ra·angaha. Ia State Boxing Championship-ko Meghalaya Boxing Association (MBA), Directorate of Sports & Youth Affairs baksa bakrime ong·atangaha.
Garo Hills-ni palo ia susaanio West Garo Hills, East Garo Hills aro North Garo Hills-ni chadamberang bakko ra·angaha jeon NGH dolni susagipa sakgittam chadamberang chongmoton me∙asa sakgni aro me∙chik saksa a∙jatangna kal∙angaha. NGH dolko ia susaaniona Meghalaya Boxing Association-ni member Chongkam G. Momin (Coach) dilangaha.
Susaanggiparangoni kg 48-50 ong·gipa category-o Resu Mongre songoni Jiasa Marak Garo Hills-oni me∙chikrangni susagrikanio saksakamkam ong∙enchimoba Gold medal-ko man·aha aro me∙asa dolni susagrikanio Resu Haluapara-ni Apasa Saldoa Marak kg 52-54 category-o Bronze medal-ko man·baskaaha. Resu Bakra-ni Baiangku Marak kg 44-46 category-o jotton ka∙bee susaangenchimoba ua rasong gribee maming medalkoba chebana man∙jaha. Garo Hills-oni chu∙gimik sak 16 chadamberang susagrikanio bakko ra∙angaha jeon sak 12 chu∙sokbagipa ong∙e medalrangko man∙angaha.
Ia chadamberangni chu·sokaniara A·chik a·songna aro mongsongbate NGH a∙jana mikkim rasongko ra·baaha ine Coach Chong G. Momin aganangaha. Una agreba a∙jao boxing-ni a∙bao tang∙doatna nanggipa rika cho∙anirang dongjani a∙selo aditan neng∙nikaniko man∙enga ine janapatan baksana mikkangchi sorkari aro Sports Department-nigita dingtang mancha ia kal∙ani a∙damko nirokangna man∙genchimode nambata gadango susagrikaniko ra∙bana man∙gen ineba Momin parakangaha.
