North Garo Hills, Mendipathar-o, gisiko nanggipa ge·a game cha·giparangna Oyster Mushroom Cluster-ko da·al salo Chief Minister Conrad Sangma nokdonggae on·angaha. Ian a·dok sorkarini chamatgipa crore 10 tangkani project ong·a jekon Mendipathar Multipurpose Co-operative Society jako ra·e kamrangko ka·na daitoko ra·aha. Ia project-ni skanggipa phase-o sak 1000 ge·e game cha·giparangna janggi tangani cholko ra·bana aro songsalna dakchakaniko on·a ka·dongsoenga.
Crore 10 tangkarangni ia project-ko ra·baaniara a·gilsak gimiko me·gimuko nangnikanirang batroroengani a·selo game cha·giparangna ia a·bao bading chiwalna namgipa cholba ong·enga. Indakgipa namgipa ja·kurangko de·e sorkari game cha·giparangna jekai mande saksana ba organization-rangna nanggipa skie on·anirangko aro dakchakaniko on·a sorkarini ku·mikchetani ong·a.
Da·al salo, iasan ong·aigija North Garo Hills-ni rubber-ko pale cha·giparangna nanggipa bosturangko aro garirangkoba suale on·angjolaha.
