Bang·a media-rango giproroani ja·mano Congress doloni sakgittam MLA-rang NPP party-ona, October jao ong·nasienggipa Gambegre bye-election-na skang napbana am·aniko koborrang man·soenga. Iani bidingo re·anggipa Robibar salo Meghalaya Pradesh Congress Committee (MPCC)-oni jangbingbanganiko jegale aganatgenchimoba adita dilgiparang chong·motan Umsning-ni MLA Celestine Lyngdoh, Nongstoin MLA Gabriel Wahlang aro Mawhati-ni MLA Charles Marngar-ko NPP dol baksa bakrimna am·enga ine u·ina man·angaha.
Uamang sakgittam MLA-rang Congress-ni State President, Vincent Pala-ni dilanio adita suk ong·gijanirang dongani a·selo NPP party-ona re·baskana tik ka·angaha ine koborrangko man·soaha. Iasan ong·aigija Chief Minister Conrad Sangma aro gipin NPP-ni gitcham dilgiparang baksa Pala-ni stape meliani bidingoba namnikgijarang ong·kataniko u·ina man·aha.
Indake ong·engon, ia sakgittam MLA-rang iarangni bidingo maming aganchakani dongkujaenga. Congress-ni gipin gitcham dilgiparangba iani gimin aganchakna man·jaha aro name tale ma·sikuja ine aganangaha.
Re·anggipa 2023 assembly election-o Congress dolrang seat ge 5 ko cheaha. Lok Sabha election 2024-o Gambegre MLA Saleng Sangma-ni MP man·ani ja·mano uko changale sak 4-ona komidapangaha. Da·o uamangoni sak 3 MLA-rang NPP dolo napangahaode Congress dol saksa kamkamona tang·ondapgenok jeon Ronnie V. Lyngdoh, Leader of Opposition (LO)-oni watna nangaona sokanggen.
