Assam Fuljhora Kokrajhar-oni A·chik saksa, India a·song gimikko cycle ga·e songreenggipa Arthur Amit S. Sangma-na on·gilaniko dakchina A·chik State Peoples’ Front (ASPF) dol social media-nigita pilak manderangko didiataha. Arthur Sangma, da·o dipet darangonikoba dakchakani man·jae cha·na ringna aro dongchak bamchakna namen neng·nikaniko man·enga. Ua da·o dipet km hajal 13 ko ‘Save Nature & Save Earth’ kattako ra·e songrebaaha.
Sangma saksa A·chik jatni aro Northeast a·jani daka rika bewalrangko a·gimikna u·iatna skanioba a·songko songre songgabatenga. Da·o ua South India chipakna sokange adita salrangna Tamil Nadu-o dongchakenga.
Sangma uni India a·songko songre songgabatanio skanggipao Hero cycle-ko sale nokoni ong·katbaaha. Nagaland-ona sokangon, uno songdonggipa A·chikskarangni on·gilanichi skanggipa changna ua second hand ba jawani jakkalgimin cycle-ko Bangalore-oniko hajal 15 tangkana breaha. Ka·sae dakchakaniko man·anichi ua uni miksongagita hajal 28 dakgipa gital cycle-ko ra·na man·jaoba namkalgipa quality-ni cycle-ko da·o brena man·aha.
Darangoni dakchakaniko ba sponsorship-ko man·pajae uni neng·nikanirangko chagronganiko u·ie ASPF dolrang Sangma-na dakchakpachina sakantikon uni Gpay-ni QR code baksa on·chapate uamang A·chikskarangko mol·molataha. Iasan ong·aigija social media-o uni page-koba ja·rikpachina aganangjolaha.
