Tura, 19 August, 2024: Tura songjinma Chitoktak gittimni ramasamo donggipa transformer bolsako da·al attamni 5 baji mang somoio wa·al kamaha. Wa·al kamani kakketgipa ja·pangrangko u·ina man·jaha jekon nikgiparangni janapanigitade mikka bitchirang nange sosiani a·sel ong·naba gnang inesan potchipangaha.
Tura jolo da·al salgimikni gisepo mikkarang aditan jimbee waangaha jean songdonggipa manderangnaba re·ruranio neng·nikaniko ra·baaha. Ian Bajengdoba-Dalu NH 51 ramaba ong·a jekon ramasamrango donggipa dokan aro nokrangko pe·e rama dal·dapatani kamrangkoba ka·enga. Ia rama gamchatbegipa ong·ani gimin kamrangko salantian ka·ani a·selo re·na dona apchangketaniko chagrongna nangaoba ga·akenga.
Ong·anggimin obostako nikgipa manderang, re·ruragiparangna maming a·selrangko ra·bajanagita bakan Tura fire brigade-na kobor on·ataha aro apsankon MeECL-naba kobor on·ataha.
