Congress-ni sakgittam MLA-rangni NPP baksa bakrimna ja·ku de·anio Minister-ni gadangko dabina maming miksonganirang dongja indiba an·tangtangni constituency-ko namroro silroroatna manchiesa kamrangko ka·angaha ine uamang parakangaha.
Uamang maming dakeba Cabinet-o rimnapchina dabiani dongja aro NPP dol maming gadangni biapko on·gen ine ku·chakanirangba dongja ine Umsning-ni MLA Celestine Lyngdoh parakataha. Chingni NPP baksa bakrimanio constituency-tangna bang·a namgnirangko jekai gital C&RD Block-ko man·ani, rama jal·ang aro gipin project-rangko Chief Minister-ni on·a ku·chakanisan ong·aia ine Lyngdoh janapangaha.
Apsandaken Nongstoin-ni MLA Gabriel Wahlang aro Mawhati-ni MLA Charles Marngar-ba manderangni namgnina kamrangko ka·na miksonga dongesa NPP-o napa ine aganangaha. Unbaksana uamangni opposition dolo donganichi constituency-tangna maming namdapataniko ra·bana man·jawa ineba agandapangaha.
