Khasi Hills-o bobil dake chakatgipa HNLC dolni saksa Equest Langsiang-ko mijal pringwalni 12:30 bajimango Bethany Hospital rama pekwatgipaoniko Ri-Bhoi a·jani pulis dolrang rim·aha. Pulis dolrangni u·iatanigitade Langsiang-oniko mobile phone-ko man·aha jeon namgija kamko ka·na miksonganiko ma·sina man·aha aro uni kosako Nongpoh Police Station-o mokordomako ka·angaha ine parakataha.
Langsiang saksa HNLC dolo jak donggipa ong·an baksana Bangladesh-o donggipa HNLC dolrang baksa bakrime kamrangko ka·enga ine u·iatangaha. Langsiang baksa adita uni dolrang Khasi aro Jaintia Hills-ni adita biaprango batanggimin August 14-15 tarikrango IED bomarangko bretatna miksongani donganiko ku·chakaha ine pulis dolrang parakataha.
Langsiang baksa IED bomarangko gopretatna miksonganio jako donggipa HNLC dolni manderangko bimung minge agananichi uamangkoba Jowai aro Nartiang-oniko rim·aha. Gipin rim·a man·gipa manderangara WJH Nartiang-ni Deiborlangki Sariang aro WJH Laskein-ni Marklan Biam ong·a ine pulis dolrang u·iatangaha.
