A·doko NPP dolrang absolute majority-ona sokdoani ja·mano MDA sorkario bakrimgipa gipin party-rang jekai UDP, HSPDP, BJP aro Independent-ni MLA-rangko ra·galani bidingo bang·a sing·anirang ong·katenga. Re·anggipa August 19 tariko, Congress doloni sakgittam MLA-rang ong·katanichi NPP chu·gimik 28 seat-rangoni 31-ona tang·doangaha. MDA sorkario da·o gipin party-rangko changope sak 47 MLA-rang ong·aha.
Jangbingbanggipa koborrangko man·on, adita NPP-ni dilgiparang United Democratic Party (UDP) dolko sorkarioni ra·galna golporimanirangko u·ina man·aha. Indake ong·genchimoba Chief Minister Conrad Sangma, cabinet-ko apsandaken chalaiangkuna miksonganiko parakangan baksa maming dingtangataniko dakjawa ine aganangaha. Iarangko niaton, Conrad Sangma-ni gisiko da·o dipet gipin party-rangko ra·galna skani chinrangko nikna man·kujaenga.
A·dok sorkario BJP-ni bakrimaniko rikgalani bidingo aganode, ma·mong sorkario NPP dol NDA sorkari baksa bakrimgipa ong·ani gimin neng·nikanirang sokbanaba gnang. Apsandaken, MDA sorkario batanggimin changrango bakrimgimin dolrangko a·rikgalanaba NPP-na namen rakbegipa kam ong·enga. Re∙baenggipa sal somoirango NPP party-rang maidakgipa ja·kurangko de·angna miksonge re·mikkanganiko sakantina sing·anirang nadoenga.
