Mijal salni bako All Meghalaya SSA Non-Teaching Staff Association (AMSSANTSA) uamangni dabianiko a·dok sorkarini ra·chakahani gimin jingjengataniko sal 21-ni ja·mano dontongangaha.
AMSSANTSA-ni President Jennifer J Synrem ni agananigitade, a·dok sorkari uamangni dormahako bilsi anti 5% mang bariatchina aro seniority-ni kri man·a nanggniko 2% on·china dabianiko ra·chakaha ine parakangaha. Indake ong·genchimoba battanggimin somoioni 80% dormaha bariatna uamangni dabianikode ra·galpilaha ineba ua aganangaha. Re·anggipa somoio dormaharangko 25% ona sorkarini bariatna am·enggipakoba AMSSANTSA jegalangaha.
SSA (non-teaching) staff-rangna pilak state, district aro block-ni gadangrango ia gital base pay-na Rationalisation Committee-ni ku·pattianiko a·dok sorkari ra·chake 2024 bilsini April 1 tariko ra·gatna am·aniko Commissioner & Secretary, Vijay Mantri parakangaha.
Iani gisepon SSA-ni State Project Director-ko Rationalisation Committee-ni 5% dormahako bariatchina ku·pattianiko 2025-2026 bilsioni base pay on·enggipao pangchake dakchina a·dok sorkari ge·etangaha. Unbaksana, district office-rangnigita pilak staff-rangko see rakkianiko name nichengchina aro changala man·gipa gipin staff-rangkoba napatchina final proposal-ko department-ona watatna skang dakchina committee-rang didiangaha. Apsandake SSA non-teaching staff-rangko Megha Health Insurance Scheme (MHIS) o napatan baksana EPFO for Provident Fund-o napatchigitaba didiangaha.
