West Garo Hills-ni ning·o ong·gipa Hallydayganj Police Station (PS)-ni Officer in-Charge (OC)-ni kosako an·tangni on·gimin bilko kragija niamni a·palo jakkalenganina a·dokni Director General of Police (DGP) (IPS) Idhashisha Nongrang-na chitti see u·iatangaha. Uamangni chittio janapatanigitade, Hallydayganj P.S-ni ning·o ong·gipa biaprango lekka panchagri niamni a·palo teer counter kuligipa, itta tarigipa, a·a salgipa, chu dokan, biri, cigarette, sada dokanrangko skulni sepangrango palgipa aro sepang jolni buringoniko bol cha·ue palgiparangoniko tangka ra·e on·gimin bilko jakkalsretenga ine janapangaha.
Iani bidingo uamang Hallydayganj P.S-o badi ka·na re·anggenchimoba ra·chakgija a·kaweni non-tribal NGO-rang ong·ani gimin kragijagipa kattarangko jakkale manenge saie watronga ine uamang janapataha. Indakgipa kamrangko ka·aniara Article 19 (1) C-o dongimin niamo pilak mandean NGO-ko chalaina aro nanga ja·kuko de·na chol on·giminko pe·ani ong·a ineba janapanagaha. Unbaksana ua A·chik jat ong·e gipin jat ba non-tribal NGO-rangni kosako indakgipa kamrangko ka·aniara Article 19 (1) (a)-o India a·songni mande sakantina on·gimin bil “Right to Freedom of Speech & Expression” niamko pe·ani ong·a ineba janapataha.
Indake ong·engon Hallydayganj P.S-ni OC, an·tangni man·gnina niamni a·palo kam ka·enganiko champengna, jolna silroro namroroaniko ra·bana aro jatska jat baseaniko bon·atnagita uni kosako am·sandianiko dake nanggipa ja·kurangko de·e kamko ka·angchina bakrimgimin non-tribal NGO dolrang a·dokni DGP I. Nongrang-ko mol·molataha.
