Batanggimin August 20 tariko Nokrek National Park-ni a·bri ja·reko donggipa Daribokgre aro Chandigre songrangona Union Minister of State for Road, Transport and Highways Ajay Tamta re·ange, ma·mong sorkarini chamatgipa scheme jekai AAY nok, Government skul, Anganwadi centre, PHC aro CHC rangko nirokangaha. Union Minister baksa West Garo Hills-ni Deputy Commissioner, Jagdish Chelani aro District-ni dingtang dingtang official-rangba re·chapange bakko ra·angaha.
Ia somoio, ma·mong sorkarini chamatgipa dingtang dingtang scheme-rangko kam ka·aniko Ajay Tamta nipiltaiange, West Garo Hills-ni Deputy Commissioner Jagdish Chelani, East Garo Hills-ni Deputy Commissioner Vibhor Agarwal, Additional Deputy Commissioner-rang aro dingtang dingtang department-rangni skotong officer rang baksa adita chanchirimanikoba dakangaha.
Uamangni chanchirimanio a·jao ma·mong sorkarini chamatgipa scheme-rang jekai Pradhan Mantri Awas Yojana Gramin and Urban, Har Ghar Jal Yojana, Mission Indradhanush, Pradhan Mantri Poshan Abhiyan, PM Ujjawala-ni kam ka·ani bidingo, Eco-Tourism ko namdapatani aro uni gamchatani, bang·a scheme-rangko namdapatna department-rangni nangrime kam ka·na nanganiko, buring bolgrimrangko ripingna, songadamrango an·seng baljokaniko aro rongtal an·talaniko rakkiani bidingo WGH-ni DC Jagdish Chelani talataniko on·angaha.
Scheme-rangko kraa bewalo kam ka·anirangko nike Union Minister Ajay Tamta uni chu·ongnikaniko parakatan baksana mikkangchi Horticulture, tourism aro gipin a·barangni kamrangkoba a·jao namdapatchina DC ko didiangaha. Chelbegipa biaprangoni tourist-rangko salbanagita wilwilao donggipa nitobegipa buring bolgrimrangko ripingchinaba ua didiangjolaha.
Gnigipa tom·anio, ua NHIDCL, PWD aro ramani kamrangko jako ra·e kam ka·gipa official-rang baksaba chanchirimaniko dakangaha jeon Garo Hills-o National Highway-nigita ramarangko dal·dapatna kam ka·ani bidingo NHIDCL-ni Executive Director, Biju Patir talate on·angaha.
Unbaksana Phulbari-oni Dhubri-ona tarigipa National Highway aro a·songo ro·batsranggipa dolong, Brahmaputra chibimako kasotgipa km 19.4 mang ong·gipa dolongko kam ka·na a·bachengataniko janapan baksana re·baenggipa 2028 bilsini September jao matchotna ka·dongsoaniko Public Works Department, Tura talate on·angskaaha.
