Garoland State Movement Committee (GSMC), GHADC-o kam ka·gipa Non Gazetted Employees Association (NGEA)-rangni dabienggipana chakpaaniko on·a, Tura Government College kal·chakramona re·bae bakrimaniko mesokangaha. NGEA, batanggipa ja 34-ni dormaharangko man·kujaenganina aro 5th pay commission-ko ra·gatchina Silent Sit In Demonstration-ko daktaina ja·ku ga·aha. Uamang ia jingjengataniko August 19 tarikoni dakna a·bachengaha.
GSMC-ni dilgipa Balkarin Marak, uamangni neng·nikanirangko chagronganina an·tangni suk ong·gijaniko parakangaha. Tom·anio aganengon, ua ia a·selrangko chagronganina GHADC-ko gimaatna dakagita nika aro nirokatna galchangenga ine aganangaha. A·chik a·songna bil on·gimin autonomous council-ko gimaatjachina a·dok sorkariko GHADC-o kam ka·giparangni neng·nikaniko niatchina ua mol·molangaha.
District council, sixth schedule aro Nokmarangna on·gimin bilko tange rakkina sakantini ja·ku ga·aniko nangenga ine Marak aganangaha. Unbaksana ja 34-na dormaha man·gija donggiparang maidakgipa neng·nikaniko chagronganiko ma·sichina an·tangtangko GHADC-o kam ka·giparangni biapo donate nipilatna janapangaha.
