Mijal walni bako, Tura Hawakana Baptist gilja nokko denggu dakgipa ma·sina man·gijagipa manderang gilja nokni glass-rangko ro·ong goprue kelki aro do·garangko nosto ka·na jotton ka·angaha. Iarang gimikkon uamang gilja nokni wilwalo dongipa cctv camera-rangko ba·rachi pindape done dakaha.
Denggu dakgipa manderang sawarangchim uko da·o dipet u·ina man·kujaenga. Iarangni gisepo gilja nokko nosto ka·gipa manderangko drug addict ba churing chupekgiparang jak dongnaba gnang ine bang·aan chanchipe aganangtokaha. Uamang do·ga aro kelkirangko nosto ka·e giljaona napdraenba giljani bosturangko cha·una miksonga gnang rusiataha ine manderang talataha.
Hawakana Baptist Church, Tura songjinmao ge·sa nina nitobegipa aro silgipa gilja nok ong·a jekon bang·a giljani dilgiparangni bimchipe kam ka·a ja·man man·aha. Ia gilja nokona Hawakana jolni manderangsan ongaigija, Tura songjinmani bang·a dingtang dingtang gittimrangoniba bakko ra·na re·baronga aro indake gilja noko nosto ka·aniara sakanti toromo bebe ra·giparangna duk ong·aniko rabaa.
